Գործարար Սամվել Կարապետյանը դատական հայց է ներկայացրել բլոգեր Ռոման Բաղդասարյանի դեմ՝ պահանջելով 6 մլն դրամ փոխհատուցում
Հունվարի 21-ին Լոռու մարզի ընդհանուր իրավասության դատարանը մասնակի բավարարեց գործարար Սամվել Կարապետյանի հայցը՝ պարտավորեցնելով քաղաքագետ Հարություն Մկրտչյանին ներողություն խնդրել նրանից վիրավորական արտահայտությունների համար։ Այս մասին հայտնեց փաստաբան Վարդան Ալոյանը։
Դատարանը նշել է, որ Facebook սոցցանցում Հարություն Մկրտչյանի կողմից արված գրառման մեջ տեղ են գտել վիրավորանքներ, որոնց համար վերջինս պետք է ներողություն խնդրի։
Սա գործարարի և բարերարի փաստաբանների կողմից տարբեր անձանց դեմ ներկայացված միակ հայցը չէ։ Ներկայիս դրությամբ հայցերի ընդհանուր թիվը հասել է 20-ի։
Հայցվորների թվում առավել ակտիվ է բլոգեր Ռոման Բաղդասարյանը, որը հաճախ աջակցում է գործող իշխանությանը։ Սամվել Կարապետյանը արդեն հինգերորդ անգամ է ներկայացնում հայց նրա դեմ։
Այս անգամ գործարարը պահանջում է դատական կարգով պարտադրել Բաղդասարյանին հերքել զրպարտանքն ու ներողություն խնդրել, ինչպես նաև որպես փոխհատուցում բռնագանձել բլոգերից 6 մլն դրամ։ Հայցի հիմքը Բաղդասարյանի հայտարարությունն է, թե իբրև Սամվել Կարապետյանը թալանել է պետական բյուջեն, ինչը, գործարարի պնդմամբ, սուտ է։ Հայցը, որը ներկայացվել է Երևանի ընդհանուր իրավասության քաղաքացիական դատարան, այժմ քննվում է դատավոր Անի Կարաքեհյանի կողմից։ Նշանակվելու է առաջին դատական նիստը։
Ավելի վաղ Սամվել Կարապետյանը նույնպիսի հայցեր էր ներկայացրել նաև հուլիս և օգոստոս ամիսներին։ Դրանցից մեկում պահանջվում էր հրապարակավ ներողություն խնդրել և 3 մլն դրամ փոխհատուցում։
Հայցվորների ցանկը բավականին ընդարձակ է և ներառում է «Քաղաքացիական պայմանագրի» պատգամավորներ Հայկ Կոնջորյանին, Արսեն Թորոսյանին, վարչապետի մամլո խոսնակ Նազելի Բաղդասարյանին, վարչապետի տեղակալ Տարոն Չախոյանին, քաղաքագետ Ռուբեն Մեհրաբյանին, Քրիստոնեա-դեմոկրատական կուսակցության նախագահ Լևոն Շիրինյանին, նախկին պատգամավոր Ազատ Արշակյանին և լրագրող Լուսինե Կեսոյանին։
Յուրաքանչյուր հայցում բարձրացվում է բարոյական վնասի փոխհատուցման հարցը։ Որոշ գործերում պահանջվում է նաև դրանց կատարումն ապահովելու համար միջոցներ կիրառել։ Օրինակ, պատգամավոր Հայկ Կոնջորյանի դեմ ներկայացված հայցի շրջանակում դատարանը 9 մլն դրամի կալանք է դրել պատգամավորի գույքի վրա։
Հայկ Կոնջորյանի դեմ հայցի հիմքում ընկած են նրա հետևյալ արտահայտությունները․ «Դուք ընդամենը որոշ բարձրաստիճան կղերականների և օլիգարխիայի սրբապիղծ ամուսնության էն մյուս կողմն եք, օլիգարխիական թևն եք», «էսօր Կտրիճ Ներսիսյանի վեղարը նման ա մի մարտագլխիկի, որի տակ հավաքվել են բոլոր ինչքան հանցագործ ասես՝ օլիգարխներ, նախկին թալանչիներ, դուրսպրծուկներ, սրբապիղծներ և ընտրապիղծներ, հիմնադիր ընտրապիղծներ։ Բոլորը հավաքվել են էս վեղարի տակ որպես մարտագլխիկ, էդ մարտագլխիկով ուզում են կրակել պետության վրա։ Եվ էրեկ էդ մարտագլխիկի տակ սահուն կերպով հայտնվեց նաև ՀԷՑ-ի սեփականատեր Սամվել Կարապետյանը»։
You may also like
