Ագարակում նշվեց Լեռնագործի և մետալուրգի օրը
Հուլիսի 18-ին Ագարակ քաղաքում տեղի ունեցան տոնական միջոցառումներ՝ նվիրված Լեռնագործի և մետալուրգի օրվան։ Տոնակատարության նախաձեռնողն ու կազմակերպիչը Մեղրիի տարածաշրջանում գործունեություն ծավալող Ագարակի պղնձամոլիբդենային կոմբինատն էր, որը հանդիսանում է տարածաշրջանի խոշորագույն ձեռնարկություններից և գործատուներից մեկը։
Տոնակատարության պաշտոնական բացումը տեղի ունեցավ կոմբինատի վարչական շենքում, որտեղ բացվեց ընկերության աշխատակիցներին նվիրված լուսանկարչական ցուցահանդես։ Ցուցադրությունը ներկայացնում էր այն մարդկանց, որոնց ամենօրյա նվիրումն ու աշխատանքը կարևոր ներդրում են ունենում հանքարդյունաբերության և մետալուրգիայի զարգացման գործում։
Գլխավոր իրադարձությունը տեղի ունեցավ Ագարակի կենտրոնական հրապարակում, որտեղ անցկացվեց հանդիսավոր պարգևատրման արարողություն։ Ագարակի պղնձամոլիբդենային կոմբինատի լավագույն աշխատակիցներն ու աշխատանքի վետերանները արժանացան պատվոգրերով և շնորհակալագրերով՝ բարձր մասնագիտական պատրաստվածության, բարեխիղճ աշխատանքի և երկարամյա ծառայության համար։
Ոլորտի աշխատողներին շնորհավորելու էին ժամանել համայնքի ղեկավարությունը, դիվանագիտական կորպուսի ներկայացուցիչներ, հասարակական կազմակերպությունների ներկայացուցիչներ, մշակույթի գործիչներ, ինչպես նաև Զանգեզուրի պղնձամոլիբդենային կոմբինատի և Ագարակի պղնձամոլիբդենային կոմբինատի ղեկավարությունը։ Իրենց ելույթներում նրանք բարձր գնահատեցին հանքագործների և մետալուրգների դերը երկրի և տարածաշրջանի տնտեսական զարգացման գործում՝ շնորհակալություն հայտնելով նրանց նվիրված և պատասխանատու աշխատանքի համար։
Տոնական միջոցառումները եզրափակվեցին մեծ համերգային ծրագրով՝ հայկական շոու-բիզնեսի հայտնի երգիչների և երաժշտական խմբերի մասնակցությամբ։ Երեկոյի գեղեցիկ ավարտը դարձավ տոնական հրավառությունը, որը լուսավորեց Ագարակի երկինքը և անմոռանալի տոնական տրամադրություն պարգևեց քաղաքի բնակիչներին ու հյուրերին։
You may also like
