Ամերիաբանկի կորպորատիվ վարկային պորտֆելը գերազանցել է 1 տրիլիոն դրամը
30 սեպտեմբերի դրությամբ Ամերիաբանկի կորպորատիվ բիզնեսի վարկային պորտֆելը կազմել է 943 մլրդ դրամ՝ ցուցաբերելով տարեկան աճի շուրջ 33% տեմպ։ Այս աճի շնորհիվ Բանկը շարունակում է զբաղեցնել Հայաստանի ամենախոշոր կորպորատիվ ֆինանսավորողի դիրքը՝ առաջարկելով անհատական ֆինանսական լուծումներ տեղական և միջազգային ընկերություններին։
Հատկանշական է, որ արդեն 31 հոկտեմբերի դրությամբ Բանկի կորպորատիվ պարտավորությունների համախառն պորտֆելը, որը ներառում է լիզինգ, ֆակտորինգ, բանկային երաշխիքներ և ակրեդիտիվներ, գերազանցել է 1 տրիլիոն դրամը։ Այս ցուցանիշը բացառիկ է Հայաստանի բանկային համակարգում։
Ամերիաբանկի կորպորատիվ վարկային պորտֆելը դիվերսիֆիկացված է և ընդգրկում է տնտեսության հիմնական ճյուղերը՝ շինարարություն, գյուղատնտեսություն, մեծածախ և մանրածախ առևտուր, հանքարդյունաբերություն, էներգետիկա, հեռահաղորդակցություն, կեցություն և հանրային սնունդ, ծառայություններ և այլն։
«Մենք բարձր ենք գնահատում մեր հաճախորդների հետ երկարաժամկետ համագործակցությունը և ներդնում ենք բոլոր ջանքերը՝ ապահովելու վերջիններիս դրական փորձառությունը համագործակցության բոլոր փուլերում։ Մենք ձգտում ենք ապահովել արագ, ճկուն և անհատականացված սպասարկում՝ հիմնված մեր հաճախորդների կարիքների խորքային ուսումնասիրության վրա։ Մեկ տրիլիոնի շեմի հատումը մեզ համար ոչ միայն նոր բարձունքի նվաճում է, այլև պարտավորեցնող արդյունք՝ շարունակելու աջակցել հայկական բիզնեսի կայուն աճին և տնտեսության զարգացմանը՝ առաջարկելով ֆինանսավորման նորարար լուծումներ»,- նշել է Ամերիաբանկի Կորպորատիվ և ներդրումային բանկինգի գծով տնօրեն Գագիկ Սահակյանը։
Ամերիաբանկը ֆինանսական և տեխնոլոգիական առաջատար հաստատություն է, որը հանդիսանում է ՀՀ տնտեսական ոլորտի նշանակալի դերակատարներից մեկը։ Թվային փոխակերպման ռազմավարության շրջանակում Բանկը շարունակաբար ներդնում է և կատարելագործում է շուկայում եզակի պրոդուկտներ, ծառայություններ և նորարարական հարթակներ՝ բավարարելու մարդկանց ֆինանսական և ոչ ֆինանսական կարիքները։
Բանկը վերահսկվում է ՀՀ Կենտրոնական բանկի կողմից։
You may also like
